N.I.D.I.S – Wieder uf Reise!

Hüt simmer also wie gseit früeh ufgstande.. Naja… es isch halt normali Ufstah-Zyt gsi. Aber mier hend ja schliesslich en bestimmte Bus nöd welle verpasse – nämlich dä uf Abu Dhabi.

Wo mer nämlich d’Reisevorbereitige gmacht hend, hemmer gmerkt, dass Abu Dhabi gar nöd so wiit vo Dubai entfernt isch – und mit em Bus täglich mehrfach bedient wird.

Mer hend also z’erst mit de Metro (wie schön isch d’Station so nöch) müesse richtig Jebel Ali fahre, 3 Statione witer – IBN Battuta, det simmer in Bus umgstiege – en moderne Reisecar mit free Wifi! Trotzdem hends eusi Jungs uf de Hiifahrt nöd brucht – sie hends vorzoge, no en Pfuus z’mache.

D’Fahrt het so ca. 1 1/4 h duret. Uf de Charte hets ziemlich nach Wüesti usgseh – doch in Würklichkeit hets eigentlich überall Siedlige gha, und was mich erstuunt het, vo Dubai bis nach Abu Dhabi isch näbet de Strass grüen gsi. Pflanze, Palme oder Strücher wo mit km-lange Schlüüch bewässeret werdet… das muess ja choschte!  Das, im Gegesatz zu Ägypte,isch halt Riichtum. In Ägypte überlebet nämlich nöd emale die hoteleigene Palme, wills Geld zum Bewässere gar nöd da isch.. Geschweige denn anere Strass – da gseht mer in Ägpyte höchstens umeflügendi Plastiksäck. D’Strasse da in UAE sind perfekt (da wird ja au ständig dra ume grüblet – Baustelle, schlimmer als in Züri!), und suuber isch es au näbet de Autobahne.

Uf em Busbahnhof in Abu Dhabi (AD) hemmer denn es Taxi gschnappet und sind richtig Marina Mall (ufeme Inseli) gfahre. Det hemmer eus z’erst gstärkt und sind denn mal wieder losmarschiert. Zu eusem grosse Erstuune, hets en totale Temperatursturz zwüschet Dubai und AB gha – mer hend nämlich nöd scho nach 2 Minute, sondern erst nach 3 Minute scho wieder alles duregschwitzt gha. Hahaha… Jänu, für die schön Ussicht ufs tüüfblaue Meer, s’Emirates Palace und de wiisi Präsidente-Palast händ sich die paar Schweisströpfli scho g’lohnt. Leider hemmer nöd is Emirates Hotel ine chöne, will Herzmaa nöd die lange Hose a gha hät. Aber defür hemmer mit em Tor-Steher vom Emirates Palace en schöne Schwatz gmacht – er het eus e chli verzellt, wie’s i dem Hotel so lauft, bis zu was er det verdient – isch interessant gsi.

Das Gebiet uf dem Inseli het e wunderschöni Strandpromenade, wo mer herrlich chan flaniere… s’het au total viel Lüüt gha, genau 4 🙂 – suscht kei Menscheseel. Isch ja au klar bi dene Temperature, da gaht normalerwis ja au keine freiwillig use. (Aber was macht mer nöd alles für es paar Caches, wo eim die tourstiste-freie, versteckte Bijous vo AB zeigt.) So hemmer eus z’Fuess und mit Taxi so dur de Tag in Abu Dhabi gschwitzt und hend einiges gseh – aber no lang nöd alles. Das macht aber nüt, mer hend en guete Idruck übercho.

Die Stadt isch e chli touristefründlicher, nöd ganz eso g’hetzt, nöd überall isch es so verdichtet baut – es het durchus viel schöni Ort zum d’Seel baumele la. Aber an öffentliche Strand chunt mer teilwies nur gege Geld ine, nöd vill, aber doch es paar Dirhams. Es git aber au en würklich öffentliche Strand, dä wird wahrschinlich eifach nöd so suuber putzt wie bim bezahlte Teil 😉 aber schneewiis und am gliches Strand isch er sowieso au. D’Lüüt chömet schiins erst ab de 4e – het mer eus gseit.

Nach einige Stunde wandere und Sightseeing, da und dort öppis Erfrischens trinke simmer irgendwenn wieder bi de Busstation gsi. I de nöche „chüele“ Mall hemmer uf d’Abfahrtszyt vom Bus zrugg gwartet und bald isch es wieder heizue gange. Während de Heifahrt isch d’Sunne über em Meer langsam de Nacht entgege gwanderet und het es schöns Liecht über de Wüesti gäh.

Am Abig simmer alli müed gsi, darum hemmer bi eusere Pizzeria (im Hotel z’underst) e Pizza bstellt und hend sie uf de Terrasse unkonventionell gässe – das isch cool gsi.

Und morn isch scho de letschti volli Tag in Dubai – die Zyt rennt.

zu den Fotos

Guete Morge, d’Sunne schiint prächtig, wieder voll obenabe!

Nach zwei so Powertäg, hemmer eus hüt mal e chli en ruhigere Tag gönnt. Mer sind au erst los, wo d’Sunne scho voll brennt… trotzdem isch es hüt agnehmer gsi, immerno glich heiss, aber nüme so füecht.

Euse Weg, mit no unbekanntem Ziel het eus emal z‘ erst am Marina Walk, direkt vor eusem Hotel, entlang gführt. Und es isch doch heiss!

Und uf eimal taucht da eso e Velomiet-Station uf! Cool!  (Mier hend vor es paar Täg scho amene andere Ort eini gseh, und denn hani im Hotel mal vorsorglich s’App abeglade und mich registriert.)  So hemmer i 5 Min d’Velo underem Fudi gha! Cooli Sach!

So simmer dem Marina Walk friedlich entlang gradlet, hend die Hochhüüser und die dezueghörende Restis i ihrne Groundfloors beguetachtet, eis am andere, aber alli no zue am Tag. Tote Hose!

Irgendwo hemmer über e Brugg müesse uf die ander Matina Siite (und zuefällig hets det druf no en Cache gha 😉 ) und denn isch es uf de andere Site witergange, bis mer nüme witercho sind, will mer denn js Meer gradlet wäret. Also Abstiege und unbedingt d’Füess is heisse Meer hebe – nöd würklich de Effekt, woni mier denn eigentlich ertäumt het. Defür isch es e wunderschöni Sicht gsi. Vo detus henner denn versuecht de Strandpromenade enzlang z’fahre, da hets aber am Afang überall so giftigi Guards gha, wo das nöd welle hend. Doch irgendwo hemmer Glück gha und hend chöne em Strandweg entlang  flaniere… Zwar stossend, aber das isch glich gsi. AHAAA! Da gaht also d’Srandparty ab! Wiisse, lange Strand, alles sehr ordentlich-gediege! Da und döt e chli Sand-Kunst oder anderi Kunst, eis vornehms Rest näbet em nöchste fast-echt-italienische Caffée… Würklich schöön….

Irgendwo det hemmer eus denn au öppis Chüels vom Starbucks gönnt, damit mer für die nöchst Etappe wieder möget. De Weg het eus denn nördlich vo de Marina Bay, richtig Internet City. Mer vermuetet mal,  das Gebiet heisst so, will det ziemli viel namhafti Computerfirmene ihre Sitz hend. (Natürli hets det au no 2 Böxli zum Sueche gha, aber das isch nume recht gsi, so hemmer zwei wunderschöni Pärk entdeckt, wo mersicher nie here gange wäret. Pärk mit Palme, Seeli und Äntli – richtig friedlich. En schöne Ort zum da und det Pause z’mache. Au wenn mit em Velo immer e chlises Lüftli gaht, sobald mer aber stah bliibt, laufts wieder in Sturzbäch us allne Poore. Jänuu, mer sind jetz innerlich sicher scho drüü Mal duregspüelt. Wie heisst das im kosmetische Fachjargon: Drainage? Kei Ahnig 😉 🙂 Das schadet sicher nöd….

d’Chräft hend denn langsam nah la, und nach 4 Stund simmer wieder i de Marina Bay acho – und : ICH BIN BEGEISTERET gsi,  dass mer händ chönne es Velo miete – isch würklich cool gsi!

Und währenddem ich uf eusere Terrasse mit em iPad de Blog schriebe, und all 2 Linie muess d’Tropfe vom Display putze, sind mini Manne im Pool, 17. Stöck witer une.

was hüt Abig lauft, weissi nonig, wahrschinlich nöd eso viel, morn müemmer früeh use!

Am Abig simmer denn doch no uf en Znacht-Spaziergang i die nöchi Marina Mall, wo mer hüt per Bike entdeckt händ. Hui, isch das aber „chli“ im Gegesatz z dene beide Malls wo mer scho gseh hend. Aber – es het feins Znacht gäh im Food Court, jede het das chönne näh, wo er Lust gha het. D’Uswahl a Abüter isch wieder supi gross gsi.

Uf em Hei-Spaziergang hani no versuecht es paar Impressione izfange…

Übrigens, mini Fotos sind nöd bearbeitet, will das macht mis chline Netbook leider nüme mit. Also alli frisch ab Knips 😉

Zu den Fotos

Uf de Tag hemmer scho sit Monate gwartet… das hät nämlich au e Vorgschicht. Also, wo mer vor 4 Jahr in Kuala Lumpur gsi sind…. aber dezue spöter meh…

Wo mer hüt am Morge ufgstande sind, isch es zum erste Mal richtig klar und blau gsi. E super Sicht! – ideal fürs hütige Projekt. I de letschte Täg isch es nämlich sehr dunstig gsi und nüt vo wiiter Sicht z’gseh gsi. Aber es isch, wie chönts andersch si – au wieder erwartet gigantisch heiss gsi. Hüt hets eus aber „fast“ nüt usgmacht.

Es isch es bitz komisch, mer chömet alli nöd so recht id’Gäng am Morge. Debi sött mer doch i sonere Stadt wie Dubai scho früeh uf zum alles go aluege. Aber ebe, bi dere Hitz isch niemert so recht motiviert scho vor em 12i am Mittag ufgweicht umezlaufe…Hahaha

Irgendwenn simmer denn doch wieder unter de gleissende Sunne zu de Metro g’eilt und vo det direkt id’ DUBAI MALL. D’Metro isch unterirdisch, durch en schier endlose Gang verbunde, so dass mer gar nöd verusse muess (wie praktisch 🙂 ).

Det acho, het sich vor eus wieder es unüberschaubars gigantiöses Gebäude, no de grössere Shopping-Mall wie gester, uftah. Es het aber au Millione vo Lüüt, viel i ihrne traditionelle Gwänder (Fraue mit Burka, Manne mit ihrne wisse lange Gwänder oder eifach sehr schön agleit) und natürlich viel chaufwüetigi Touriste. Es isch immer no die Fiirtig nach em Ramadan – überall chamer au lässe: Eid Mubarak – was so viel heisst wie „Frohes Fastenbrecherfest“. Also ab is Gwüehl!

Scho chli ufgwärmt vo gester, hemmer hüt scho gwüsst, was „gross, grösser, am grösste“ heisst i Sache Shopping und trotzdem häts eus wieder überwältigt: über 1200+ Gschäfter hets det ine, mer weiss au gar nöd wo here gah – überall hets Sache z’bewundere – nöd nur Shops-mässig, sondern au anderi Attraktione.

Was eus da debi wieder zum Schmunzle bracht het, isch die Kunstisbahn z’mitzt ine gsi. Da sind wieder ganz viel uf em Iisfeld gsi (Eishockeyfeld-Grössi), söttig wo’s hend chöne, aber die meiste sind eher gwagglig uf de Schliifschueh gsi. Es köstlichs Bild isch gsi, dass die meiste churzärmlig, es paar mit Shorts oder Fraue mit de Voll-Burka uf em Isfeld gsi sind. Da hemmer es paar lustigi Szene vo obe chöne beobachte. Doch eusi Ziel sind weder chrömle oder Schlittschueh laufe gsi – sondern hüt hemmer en trennte Tag gmacht. Mini Manne hets in SEGA Indoor – Themepark zoge (und das isch absolut nüt für mich, so video-animierti Bahne und game, da dreits mer alles zunderobsi) defür bin ich in Unterwasserzoo mit Aquarium gange.

D’Jungs sind vo SEGA sowit happy zrugg cho – doch wer schon in Orlando gsi isch, und det d’Hulk-Bahn überstande het – isch halt vo da eher…naja, wohl enttüscht.

Min Ufenthalt im Aquarium isch interessant und friedlich gsi, het teils recht komischs Unterwassergetier gha, aber au det, wer scho mehrfach im oceanografic in Valencia gsi isch… isch das nöd würklich s’Top vom Top – aber trotzdem e schöni Abwechslig gsi.

Ich bin e chli frühener fertig gsi als mini Manne, darum bin ich glaub ums ganze Gebäude rundumegloffe, also indoor, um alli Shops, Rolltreppe ufe und äne wieder abe, und da wieder ufe und irgendwo wieder abe. Wemmer nöd ufpasst, gaht mer det ine echt verlore, es het so viel Gasse und Quergasse – es riise Labyrint. Darum tüemmer jetzt d’Füess ziemli weh. (Schlimmer wie vorletscht Wuche nach 2 Täg Power-Wandere im Wallis !)

Denn bin i au mal no churz veruse, go luege wie’s Wetter isch…hihi Nei go en Cache sueche, aber woni ums halbe Gebäude ume han müesse laufe, und scho knapp wieder bim Siedepunkt acho bin, hani d’Suechi abbroche….

Denn hemmer eus alli gege die 5i wieder troffe. Euses nächste Ziel rüeft…

Ah ja, da bin i eu ja no e chlini Gschicht dezue schuldig. Ebe, vor 4 Jahr womer in Kuala Lumpur gsi sind, hemmer uf d’PetronasTowers ufe welle – aber ohni monatelanges Vorreserviere ischs det leider nüt drus worde…. (De Huussäge isch det grad echli in Schieflag cho). Drum, mer hend drus glärnt und hend d’Billett für d’Ussichtsplattform vom Burj Khalifa scho länger diheime reserviert gha.

Churz vor de sechse isch es denn sowit gsi, und mir sind i 1 Minute zum 124. Stockwerk / 452m höch ufe transportiert worde – Ohredruck nach 10 Sek inklusive ;-).

Obe hets e 180° Usse-Plattform – und jede Mängi vo Lüüt. So het mer sich immer es Stückli witer übere müesse es Plätzli erkämpfe zum Abeluege und Fötele.

D’Ussicht isch echt faszinierend – rundume! Da bliebt eim au eifach s’Muul vor Stuune offe.Schöön! Die andere 180° sind Indoor – au det hemmer eus rundume zwängt. Aber schlussendlich het mer immer es guets Plätzli gfunde. Mer sind so lang d’obe blibe, bis mer de Sunneuntergang und s’Inachte plus de Dubai Fontain (es riisigs Wasserspiel, unterhalb vom Burj Khalifa mit Liechtshow) vo obe hend dörfe gseh. Es isch echt schön gsi det obe – und so viel zum Entdecke – es echts Highlight – wo mer eifach muess gseh ha! Unforgettable moments!

Aber au de Moment isch irgendwenn verbi und eus hets grad direkt vom Bode-Usgang us id’Foodhall vo de Dubai Mall inegfüehrt. Da mer vorher schomale e chli “gschneugget” hend, was es det so alles git (mer chan sichs so vorstelle wie am Flughafe Chlote, wo verschiedeni Chöch grad nebet enand ihri Sache feil haltet – nur e chli gediegener).

D’Jungs hend sich e Pizza inezoge und mier hend eus es feins Sushi-Plättli mit 2 x 12 verschiedene Sorte genehmigt (natürlich nöd zu so überrissene Priise wie bi eus).

Und zum Schluss, bevors mit de Metro am 22h wieder Heizue gange isch, hani mini Familie nomale “gnötigt” mit mier de Cache vom Namittag go z’Sueche, was jetzt vo de Temperatur her, wesentlich agnähmer gsi isch, (als bi gfühlte 50°). Da ich schomal vorschwitzt han– äh, vorgsuecht han, isch jetzt de Fund ziemlich zügig gange. Yeah – wieder mal eine gfunde…

Und will d’Läde ja da nöd eifach am 20h schlüsset, simmer dihei no de Zmorge für morn go poschte – echt praktisch.

Miteme chüele Drink (da hets ja kei Alkohol – also nur miteme Cola Zero und de Reto mit sim us de CH mitbrachte Quöllfrisch) verabschied ich mich für hüt, vo de Terrasse, wo mer no d’Nachtstimmig – die farbig belüchtete Hochhüser und d’Marina under eusem Balkon, gnüsset. Gueti Nacht!

Zu den Fotos

Wo ich hüt am Morge d’Auge ufgmacht han, hets scho hell zwüschet de Vorhäng dureglüchtet. Bim gnauer here gah, sind d’Schiibe scho heiss gsi – und blaue Himmel am 7.30h… Gester isch es eher dunstig gsi, und sogar no e chli bewölkt am Himmel. Es verspricht also en schöne Tag z’werde – hahaha… (Wär het das tenkt 😉  ).

Irgendwenn isch au d’Jungmannschaft usekroche, denn hemmer fein z’Mörgelet und los geht’s auf in die Hitze!

Zum Glück het min Herzmaa e bestens glegeni Unterkunft gfunde, so dass mer gar nöd wit hend müesse schwitze bis zu de Metro – trotzdem hets glanget, zum Gspüre, dass au hüt wieder alli Poore duregreiniget werdet.

Gemein und gföhrlich isch nur, wenn mer denn id’Metro Station inechunt, mit dere Abechüehlig, da gspürt mer erst recht, wo mer denn überall nass isch, will denn de Stoff grad igfrürt….

Mier sind den ziemlich lang mit de einte vo dene zwei Metrolinie quer dur Dubai düst, es het praktisch nume Manne i de Metro, uf de Strasse, i de Gasse… wenn Fraue, dann nur „Touristinne“ vo irgendwo.

Das fühlt sich denn mängisch scho chli unagnehm komisch a, wenn mer denn alli Blick uf eim gspürt… Aber da müends halt dure, die Araber – hahaha 😉

Mier sind denn im Gebiet vo de Soukhs z’Fuess umegschwitzt, durch die alte Gasse vo Dubai und dur de Gold- und de Fisch-Markt. Schad isch gsi, will ab gester de Ramadan fertig gsi isch und jetzt die höchste Fiirtig folget „Happy Eid al-fitr to all“, sind no viel Frücht- und Fisch-Märktler gar nöd am schaffe gsi. Aber en Idruck hemmer glich übercho  – und em Justin isch’s nachher richtig schlecht gange wege dene „differente“ Grüch…(mer kennet ihn ja 😉

Völlig ufgweicht simmer irgendwenn wieder binere Metro-Station gsi. Und uf de Fahrt i die einst grössti Shopping-Mall uf de Welt, the „Mall of the Emirates“ hemmer wieder chönne tröchne.

Und wo mer det i die Mall ine cho sind, isch eus wiedermal de Chinnlade bis fascht uf de Marmorbode abegheit. Viel Elektronik-Läde im eine „Quartier“, denn wechslets zu Mode für die vom Laufsteg bis zu de Chlinste, det en Huushalt-Teil bis zu antikste Möbel usw. aber eifach nöd nur „Glattzentrum“ mässig – sondern eifach bis die 15 cm hochhackige Absätz flach glaufe sind… (also nöd mini).

Und irgendwenn, da simmer det acho, was mer unbedingt hend welle go luege: Ski DUBAI !

Genau! Die hend det agrenzend a die Mall no es „Ski-Gebiet“ (sie säget: Ski Resort)  mit 1 Sessellift, 1 Händschefrässer, enere Bob-Bahn, Pinguin (echti) und no es paar Sache für die Chliine. Die 5 Pistene sind blau, rot und schwarz, ufere Längi vo max 400 m, s’het e Ski-Schuel und d’Usrüstig chunsch det über.

Durch riisigi Fenster gseht mer vo usse ine – mier hend eus echt fascht en Schranz glachet – so… ach ich weiss au nöd, wie mier dem söllet säge, eifach „andersch“ halt. Es sind alli „gnormt“ mit de gliche Schi-Azüg und die Skiwelt gseht so unnatürlich us, wie im Winter im Glattzentrum d’Winterdeko-Welt. Aber: es het Unmenge vo Lüüt gha, wo a de Kasse Schlange gstande sind – es isch de totali Renner. Mier hend das paradoxe Bild eifach nume gnosse und glachet und eus amüsiert.

Denn hemmer au öppis chalts brucht und hend eus im Starbucks au öppis chüels feins „es Frappucino“ (Frappé mit Glacé und Rahm obedruf) gönnt.

Geocaching, 2. Versuech: Und nachdem mer denn no de Final vom chline SKI DUBAI-Multi gsuecht und au nöd gfnunde hend, simmer id Metro und wieder Hei. Scho soo spat isch es wieder gsi…

S’schönst wemmer Hei chömet isch denn: weg mit em nasse Fummel und ab uf d’Terrasse go de Sunneuntergang uf em Meer zwüschet de Hochhüser z’beobachte.

Guet Nacht – bis morn… wenn au d’Hitz wieder versuecht eus z’besiige… 😉

zu den Fotos

Mer hend eus hüt am Morge e chli länger Zyt la mit Ufstah, simmer doch au erst so spaht id Heia. Gschlafe hemmer au alli guet, mer ghört nüt da obe im 19. Stock 🙂

So hemmer hüt de selber mitbrachti Zopf zmörgelet und denn isch es losgange:

Mer machet d’Tüür vo de Hotel-Lobby uf, und ZÄCK! trifft eus en Schlag is Gsicht °-° Nüt gföhrlichs… Aber gemein und fies: Die volli Schlagchraft vo dere brutale Hitz trifft eus und fesslet eus grad im gliche Moment. Sie isch schwer, dick und heiss – die DUBAI-Luft.

OK Familie… Da müemmer jetz i de nächste Täg dure. Gmüetlich, will jedi Körperbewegig chönti Überschwemmige vo körpereigene Flüssigkeite verursache, simmer gstartet grad unterhalb vo eusem Hotel, de Marina Bay entlang. Es het en schöne Pathway entlang dere chline Lagune, mit vielne Restis und Lädelis. Aber leider alles irgendwie „under Construction“, also unterem Strich nüt bruuchbars für de Znacht.

Wiit simmer nöd cho, mer hend scho nach 10 Min müesse alli 4 unteres Schatteplätzli vomene Baum zwänge.  Da het de Häuptling gsproche: Mier nämet es Taxi!

Zum Glück hets die da a jedem Egge und so simmer bald bi de Monorail-Station vo de Palme (The Jumeirah Palm). E so e Monorail isch scho cool, sie isch wie en Panorama-Wage bi eus – mer hend die unendliche Baustelle vo dere Palme chönne bestens gseh vo obe, aber au die nette Villene det druf.

Natürlich simmer z’erst emale is Atlantis Hotel, zum eus mal en Überblick z’verschaffe. Alles gediege und protzig schöön!
Denn isch de Plan gsi, dass mer det au no mini erste 1-4 DUBAI-Caches findet. Doch leider isch das fast 2 km entlang am üsserste Palmering entlang gsi – was mer au tatsächlich gloffe sind. Aber ich muess zuegäh, too much a dere Sunne! Die andere zwei, uf de andere Site hemmer mit em Taxi gemacht und leider nöd gfunde 🙁 (leider en D5-er für Insider, was schad isch, wills es schwers Rätsel gsi isch).
Jänu, so simmer denn mit de Monorail wieder zrugg, ines Taxi inegumpet und zum Burj Al Arab gfahre.
Det chunt mer natürli nöd direkt here, sondern nur bis zum Hotel Jumeirah Beach. Sehr e schöni Alag, amene herrliche wiise lange breite menscheleere Sandstrand (wer gaht au bi dere Hitz scho an Strand??)
Selbstverständlich hemmer det eifach d’Füess müesse is Meer inehebe – aber es het sich scho fascht a de Schmerzgrenze „heiss uf de Huut“ agfühlt. Autsch!
(Ich glaub, mer sind no nie amene Ort gsi – wo s’Meer sooo heiss isch.)
Nachher hemmer nomal en Suech-Versuech gmacht, aber au da simmer erfolglos bliibe.
Mittlerwile simmer i de Chleider scho zum 4. Mal ufgweicht gsi, so dass mer erneut es Taxi gschnappet hend und Hei zue gfahre sind.
Oh, was das schön gsi isch, i eusi küehlti Wohnig zrugg cho.
D’Manne sind denn no in HotelPool go plantsche, währenddem ich de nahendi Sunneuntergang zwüschet de Hochhüüser gnosse han uf de Terrasse.
Mit de Hoffnig, dass es am 9i 3 Grad abküehlet het, simmer den imene nöche Resti go Znachtesse, nachdem mer nomal en Nachtspaziergang durch d’Lagune gmacht hend. Plötzlich hemmer en Mänscheuflauf gseh und dicke Rauch isch i de unterste Etage vomene Hochhuus usecho – d’Füürwehr het müesse cho. Aber gschwitzt hemmer natürlich immer no ;-)))
So isch euse ersti Tag interessant, heiss und feucht-fröhlich
z’End gange. Mer freuet eus scho uf morn, wenns wieder heiss: Lasst uns schwitzen, soll ja gesund sein!

zu den Fotos

Min erste Blogitrag … es isch da mittlerwile scho fascht 01:45h (aber da bi eus erst 23.45h isch… bin i no hell wach.

Mer sind mitere Viertelstund Verspötig abgfloge und hend en ruhige Tagflug gha. Mer hend eus gwunderet, aber de Flug id Hitz isch graglet volle gsi.

Nach em “Der Medicus” (jetzt han en au gseh Dâniela ;-b) und “Der Hundertjährige, der aus dem Fenster stieg und verschwand” und no amene Krimi simmer ruhig in Dubai glandet. De Landeaflug isch bereits sehenswert gsi i de Nacht. Leider isch das us em Flugi nöd ganz eso eifach gsi zum fötele. Wo mer zum Flugi usgstiege sind, isch eus scho die schwüüli heissi Luft entgege gschlage. Am 23h/11i isch es no immer 40° gsi. Denn simmer durch de idrücklichi Flughafe gwanderet bis zum Baggage Claim. Mer hend scho fascht banget um ein Koffer, de het eifach nöd welle cho, denn eine het euse Koffer bereits scho ab em Belt gno, und denebet anegstellt, het wahrschinlich gmeint, es segi sine – und mier hend gwartet und gwartet… bis mer en denn doch no entdeckt hend.

Mit dem Taxi simmer denn rund 25km fast nur grad us zum Hotel gfahre. Verbii a villne Riise-Plakatwänd, Hochhüüser und Liechter-Skylines.

Nach em ichecke im Hotel simmer in 18! vo 20 Stockwerk ufegfahre. Wo

eus zum erste Mal de sprichwörtli “Chinnlade abegheit” isch: Mer hend es gigantischs Appartment uf zwei Stöck! D’Jungs sind natürlich sofort dur die ganz Wohnigs-Villa duregflitzt und hend mal vo da, mal vo det grüeft: Mama! Papa! Chömet go luege!

En Traum die Wohnig! Und da mer no d’Eck-Wohnig hend, hemmer au e schön, schöner am schönste Nacht-Skyline-Ussicht, direkt vor de Nase! Wow – das isch ja en Uftakt!

De Justin het leider wieder mal gschnödet im Flugi mit Esse, so het de Reto nach de 12e no Spaghetti kochet 😉 (schliesslich isch bi eusere Zytrechnig ja erst 10i)…

Und rund am 1:00 simmer denn so langsam is Bett…

Während ich das schriibe, sind mini Manne scho am pfuuse und ich bin gspanne, wie morn alles bi Tag usgseht. Ich freu mich druf – Guet Nachti!

… zu den Fotos

Man wartet immer tagelang, nei monatelang bis die langersehnte Ferie äntli chömet.

Jetzt isch es sowiit – nur no ei Mal schlafe. Doch irgendwie het mer immer s’Gfühl, mer sötti no 1000 Sache mache: Zum Bispiel Putze.  Ich weiss gar nöd, warum mer sich immer so en Stress mache muess bevor mer uf und devo dörf. Isch es für d’Ibrecher, wo natürlich e ufgruumeti Hütte viel toller findet zum Verwüste? Oder isch es eifach wills jede macht? Oder isch es eifach …? Jänu – ich hans au hinter mich bracht (so meh oder weniger). S’Gepäck isch bereits ufgäh, dass heisst morn en easy Morge mit Reste-Zmorge und den langsam uf de Flughafe…

Bliebet xund und munter und man liest sich 😉