N.I.D.I.S – Wieder uf Reise!

Da bini wieder… Nach es paar Tag „Ferie“ meldi mi wieder… Es isch nüt Speziells passiert, eifach Ferie gmacht und nüt tah!

Am letschte Samstig hemmer euses schöne Penthouse in Dubai müesse verlah, hend eus es Taxi gschnappet mit Sack und Pack und sind in Richtig Norde gfahre. D’Fahrt het ca. 1 1/4 h duret – quer durch d’Stadt Dubai, verbii a allne tolle Ort, wo mer die sind go bsueche… Nomale en letschte Blick uf de Burj Al Arab, d’Dubai Mall ider de Burj Khalifa… Schee wars!

Es isch unglaublich, wie schnell mer us de Stadt dusse isch und eim schier endlosi Sandfläche ablendet. De helli Sand wechslet bald in roti Sanddüne… verbii a chline Dörfli oder da und det entdeckt mer es paar Kamel oder Dromedars, wo sich im Schatte vo de spärliche Bäum anenand dränget. Suscht hets nöd vill….

Vo wiitem tauchet plötzlich es paar wenig Hochhüüser am Horizont uf. Isch das echt RAS AL KHAIMA? Die erste Hüüser tauchet uf, kei Hochhüser, meistens nur 1- / 2-stöckigi eher schäbigi Hüser, wo die bunti Huusfarb abblätteret und une ine meistens irgend es Business dine isch (wo mier aber sicher nöd ine gah würdet). De Taxi-Chauffeur het sich es paar Mal verfahre, bis mer denn doch no plötzlich vor em Hotel ghalte hend. Bim Usstiege schmöckt mer s’Meer ;-), das chunt guet.

RAS AL KHAIMA

D’Lobby macht en gediegene iladende erste Idruck. Am Desk werder mer mit chüele nach Zitrone duftende Erfrischigs-Wöschlümpe und eme feine Sirup empfange. De Check-in het uf Dütsch stattgfunde… Miteme Golf-Wäggeli simmer denn zu eusem Bungalow gfahre worde… Mier hend 2 Junior-Suitene grad nebet enand, verbundeni Zimmer gits keini. Aber d’Jungs gnüsset das richtig eleige de Chef z’siii 😉

Vor eusne Zimmer hets es chlises Wieseli mit Liegestüehl und nomale 10 m witer isch de Strand mit „eusne“ Liegestühel. was will mer no meh?!?!

Sither verbringet mer euses Zyt mit em  süesse Nüttue!

Es isch natürlich nach wie vor brutal heiss, zum Glück gaht am Strand immer es Lüftli – suscht isch es nld zum Ushalte (a de Sunne ligge scho gar nöd,).

Denn wenn mer churz vor em Siedepunkt isch, wettmer en Schwumm im Meer go mache… das fühlt sich denn öppe eso a, wie wenn mer dihei i die heissi Badwanne stiigt.:. also leider au kei Abchüehlig! Aber schön isch es trotzdem.

Apropos, ich muess denn mal los, uf d’Suechi vomene küehlte Pool, wie eus zu Ohre cho isch… bis denn!

zu den Fotos (leider nöd sortiert (mangels Internet)

So langsam setzt eus die Hitz scho e chli zue… so hemmers hüt Morge gmüetlich gno. Das isch au guet so gsi, wie sich spöter usegstellt het.

Wo mer nämlich a d’Metrostation cho sind, sind im lange Gang vorher, scho ganz viel Lüt gsesse und hend gwartet. Zwei bewaffneti Militärs hend eus denn au agwiise mer söllet det warte. Hm… Was isch denn da los: au d’Gitter vom Igang sind dunne gsi! en Aschlag? es komischs Gfühl beschlicht eus.

Da het öpper erbarme mit eus gha und erchlärt eus, dass de Islam ja hüt „Sunntig“ hät, und darum bis am 13h alles gsperrt isch… Achso!!!

Ja das hemmer ja eigentlich scho gwüsst, nur dass es denn mit em Öffentliche Verkehr e chli schwierig isch, das nöd. Irgendwenn, e Viertelstund spöter, hemmer denn euse öV-Tagespass gha. Also alles wieder zrugg laufe bis zum Usgang vo de Metrostation, und das isch es rechts Stuck zum Laufe, will die ja so üppig zum Gigantismus neiget da in Dubai, und usse dra isch grad d’Busstation und au en Bus. Wie praktisch, genau dä, wo mier bruchet 🙂 De Plan gaht uf – i drüü Minute (gem. Fahrplan – au am Fritig), fahrt er ab. Da stömmer wiedermal a de brüetende Hitz und wartet und wartet und wartet. und wo am 20vor2 die Bustüüre immerno gschlosse sind, nämet mer es Taxi. (Und warum hemmer jetz en öV-Tagespass gno???) Haalllooo???

S‘ Taxi het eus zunere andere Busstation bracht, vo wo us mer bis ganz in Norde vo Dubai chan fahre und dass erst denn no ohni Problem…

Euses hütige Programm isch gsi, mer fahret es bitz de Geocaches nah, die bringet eim sowieso a die versteckt-schöne oder interessante Plätz.

So hemmer das gmacht, vom Süde bis ganz in Norde ufe, zwüschet dure da und det mal useghüpft und es Böxli gsuecht oder en Fotohalt gmacht, denn wieder i die klimatisierte Bushüüsli zrugg go warte und i wenige Minute isch scho de nöchst Bus cho.Eigentlich hani gar nöd so vill gfötelet, will im Bus hets vo de Sunne so i de Schiibe gspieglet, dass mer uf em Foti nüt gseht, aber es isch de Küste entlang gange, wo mer über riisigi izünti Paläst, ganzi Medizinerquarier, Fashionquartier, au mal e chli schäbigeri, denn wieder protzig gigantiösi Baute gseh hend. Nöd z’vergesse, die viele Moschee, wo’s spötestens all 300-400 m gha het (bi dere Hitz chammer ja nöd eso wiit laufe 🙂 )

Spöter simmer uf ‚Metro umgstiege, und hend s’gliche wieder abwärts gmacht, da und det usgstiege, umegloffe und witer, bis mer am 18:30h verschwitzt und schockgfrostet wieder dihei gsi sind.

Sunneuntergang gnüsse uf de Terrasse (de Reto het sis letschte mitbrachte Bierli gnosse… Uiii…), en Schwumm im Pool und spöter, nachere Siesta simmer wieder i de Marina Mall in Foodcourt go esse. Hüt hemmer eus es exzellents indisches Menue, mit Suppe und Salat für zu zweit 17.- CHF usgsuecht… so fein gsi!

D’Jungs varieret immer zwüschet em gelbe M und Pizza…hahah… guet machets soviel Sport.

Morn werdet mer Dubai verlah… Ob und wie ich denn no schriebe chan, isch no ungwüss. Aber ich gibe alles 😉

zu de Fotos