Uf de Tag hemmer scho sit Monate gwartet… das hät nämlich au e Vorgschicht. Also, wo mer vor 4 Jahr in Kuala Lumpur gsi sind…. aber dezue spöter meh…<\/p>\n
Wo mer hüt am Morge ufgstande sind, isch es zum erste Mal richtig klar und blau gsi. E super Sicht! – ideal fürs hütige Projekt. I de letschte Täg isch es nämlich sehr dunstig gsi und nüt vo wiiter Sicht z’gseh gsi. Aber es isch, wie chönts andersch si – au wieder erwartet gigantisch heiss gsi. Hüt hets eus aber „fast“ nüt usgmacht.<\/p>\n
Es isch es bitz komisch, mer chömet alli nöd so recht id’Gäng am Morge. Debi sött mer doch i sonere Stadt wie Dubai scho früeh uf zum alles go aluege. Aber ebe, bi dere Hitz isch niemert so recht motiviert scho vor em 12i am Mittag ufgweicht umezlaufe…Hahaha<\/p>\n
Irgendwenn simmer denn doch wieder unter de gleissende Sunne zu de Metro g’eilt und vo det direkt id\u2019 DUBAI MALL. D’Metro isch unterirdisch, durch en schier endlose Gang verbunde, so dass mer gar nöd verusse muess (wie praktisch \ud83d\ude42 ).<\/p>\n
Det acho, het sich vor eus wieder es unüberschaubars gigantiöses Gebäude, no de grössere Shopping-Mall wie gester, uftah. Es het aber au Millione vo Lüüt, viel i ihrne traditionelle Gwänder (Fraue mit Burka, Manne mit ihrne wisse lange Gwänder oder eifach sehr schön agleit) und natürlich viel chaufwüetigi Touriste. Es isch immer no die Fiirtig nach em Ramadan – überall chamer au lässe: Eid Mubarak – was so viel heisst wie „Frohes Fastenbrecherfest“. Also ab is Gwüehl!<\/p>\n
Scho chli ufgwärmt vo gester, hemmer hüt scho gwüsst, was „gross, grösser, am grösste“ heisst i Sache Shopping und trotzdem häts eus wieder überwältigt: über 1200+ Gschäfter hets det ine, mer weiss au gar nöd wo here gah – überall hets Sache z’bewundere \u2013 nöd nur Shops-mässig, sondern au anderi Attraktione.<\/p>\n
Was eus da debi wieder zum Schmunzle bracht het, isch die Kunstisbahn z’mitzt ine gsi. Da sind wieder ganz viel uf em Iisfeld gsi (Eishockeyfeld-Grössi), söttig wo’s hend chöne, aber die meiste sind eher gwagglig uf de Schliifschueh gsi. Es köstlichs Bild isch gsi, dass die meiste churzärmlig, es paar mit Shorts oder Fraue mit de Voll-Burka uf em Isfeld gsi sind. Da hemmer es paar lustigi Szene vo obe chöne beobachte. Doch eusi Ziel sind weder chrömle oder Schlittschueh laufe gsi – sondern hüt hemmer en trennte Tag gmacht. Mini Manne hets in SEGA Indoor – Themepark zoge (und das isch absolut nüt für mich, so video-animierti Bahne und game, da dreits mer alles zunderobsi) defür bin ich in Unterwasserzoo mit Aquarium gange.<\/p>\n
D\u2019Jungs sind vo SEGA sowit happy zrugg cho \u2013 doch wer schon in Orlando gsi isch, und det d\u2019Hulk-Bahn überstande het \u2013 isch halt vo da eher\u2026naja, wohl enttüscht.<\/p>\n
Min Ufenthalt im Aquarium isch interessant und friedlich gsi, het teils recht komischs Unterwassergetier gha, aber au det, wer scho mehrfach im oceanografic in Valencia gsi isch\u2026 isch das nöd würklich s\u2019Top vom Top \u2013 aber trotzdem e schöni Abwechslig gsi.<\/p>\n
Ich bin e chli frühener fertig gsi als mini Manne, darum bin ich glaub ums ganze Gebäude rundumegloffe, also indoor, um alli Shops, Rolltreppe ufe und äne wieder abe, und da wieder ufe und irgendwo wieder abe. Wemmer nöd ufpasst, gaht mer det ine echt verlore, es het so viel Gasse und Quergasse \u2013 es riise Labyrint. Darum tüemmer jetzt d\u2019Füess ziemli weh. (Schlimmer wie vorletscht Wuche nach 2 Täg Power-Wandere im Wallis !)<\/p>\n
Denn bin i au mal no churz veruse, go luege wie\u2019s Wetter isch\u2026hihi Nei go en Cache sueche, aber woni ums halbe Gebäude ume han müesse laufe, und scho knapp wieder bim Siedepunkt acho bin, hani d\u2019Suechi abbroche\u2026.<\/p>\n
Denn hemmer eus alli gege die 5i wieder troffe. Euses nächste Ziel rüeft\u2026<\/p>\n
Ah ja, da bin i eu ja no e chlini Gschicht dezue schuldig. Ebe, vor 4 Jahr womer in Kuala Lumpur gsi sind, hemmer uf d\u2019PetronasTowers ufe welle \u2013 aber ohni monatelanges Vorreserviere ischs det leider nüt drus worde\u2026. (De Huussäge isch det grad echli in Schieflag cho). Drum, mer hend drus glärnt und hend d\u2019Billett für d\u2019Ussichtsplattform vom Burj Khalifa scho länger diheime reserviert gha.<\/p>\n
Churz vor de sechse isch es denn sowit gsi, und mir sind i 1 Minute zum 124. Stockwerk \/ 452m höch ufe transportiert worde \u2013 Ohredruck nach 10 Sek inklusive ;-).<\/p>\n
Obe hets e 180\u00b0 Usse-Plattform \u2013 und jede Mängi vo Lüüt. So het mer sich immer es Stückli witer übere müesse es Plätzli erkämpfe zum Abeluege und Fötele.<\/p>\n
D\u2019Ussicht isch echt faszinierend \u2013 rundume! Da bliebt eim au eifach s\u2019Muul vor Stuune offe.Schöön! Die andere 180\u00b0 sind Indoor \u2013 au det hemmer eus rundume zwängt. Aber schlussendlich het mer immer es guets Plätzli gfunde. Mer sind so lang d\u2019obe blibe, bis mer de Sunneuntergang und s\u2019Inachte plus de Dubai Fontain (es riisigs Wasserspiel, unterhalb vom Burj Khalifa mit Liechtshow) vo obe hend dörfe gseh. Es isch echt schön gsi det obe \u2013 und so viel zum Entdecke \u2013 es echts Highlight \u2013 wo mer eifach muess gseh ha! Unforgettable moments!<\/p>\n
Aber au de Moment isch irgendwenn verbi und eus hets grad direkt vom Bode-Usgang us id\u2019Foodhall vo de Dubai Mall inegfüehrt. Da mer vorher schomale e chli \u201cgschneugget\u201d hend, was es det so alles git (mer chan sichs so vorstelle wie am Flughafe Chlote, wo verschiedeni Chöch grad nebet enand ihri Sache feil haltet \u2013 nur e chli gediegener).<\/p>\n
D\u2019Jungs hend sich e Pizza inezoge und mier hend eus es feins Sushi-Plättli mit 2 x 12 verschiedene Sorte genehmigt (natürlich nöd zu so überrissene Priise wie bi eus).<\/p>\n
Und zum Schluss, bevors mit de Metro am 22h wieder Heizue gange isch, hani mini Familie nomale \u201cgnötigt\u201d mit mier de Cache vom Namittag go z\u2019Sueche, was jetzt vo de Temperatur her, wesentlich agnähmer gsi isch, (als bi gfühlte 50\u00b0). Da ich schomal vorschwitzt han\u2013 äh, vorgsuecht han, isch jetzt de Fund ziemlich zügig gange. Yeah \u2013 wieder mal eine gfunde\u2026<\/p>\n
Und will d\u2019Läde ja da nöd eifach am 20h schlüsset, simmer dihei no de Zmorge für morn go poschte \u2013 echt praktisch.<\/p>\n
Miteme chüele Drink (da hets ja kei Alkohol \u2013 also nur miteme Cola Zero und de Reto mit sim us de CH mitbrachte Quöllfrisch) verabschied ich mich für hüt, vo de Terrasse, wo mer no d\u2019Nachtstimmig \u2013 die farbig belüchtete Hochhüser und d\u2019Marina under eusem Balkon, gnüsset. Gueti Nacht!<\/p>\n